• en
• ca
• cs
• de
• es
• fi
• fr
• gd
• hu
• it
• ja
• nl
• pl
• pt
• ru
• sr
• tr
• zh

A' stèidheachadh slighean le plèanaichean

Thèid puirt-adhair a chleachdadh le carbadan-adhair a leithid plèanaichean is heileacoptairean airson falbh, dol air tìr, luchdadh, dì-luchdadh is obair-chàraidh. Ged a tha puirt-adhair is carbadan-adhair caran daor, tha iad furasta ri an cleachdadh oir cha leig thu leas rathaidean a thogail o phort-adhair gu port-adhair.

San oideachadh seo, ionnsaichidh tu mar a thogas tu puirt-adhair is mar a lorgas tu na h-àiteachan as fhearr air an son.

Port-adhair beag (3*4)

Lorg àite freagarrach

(Cuimhnich: Briog is slaod le putan deas na luchaige gus gluasad timcheall a' mhapa)

Lorg buidheann de thaighean – seo baile. Chì thu ainm a' bhaile na mheadhan, ga leantainn le àireamh ann an cromagan a dh'innseas an àireamh-shluaigh dhut. Feuch an lorg thu baile sa bheil 1000 a' fuireach air a char as lugha. Tha e cudromach cuideachd gun lorg thu baile aig a bheil rum gu leòr airson port-adhair beag (3*4).

Tog port-adhair

1. Briog air a' phutan puirt-adhair sa phrìomh chlàr-taice. Fosglaidh seo bàr-inneil gus puirt-adhair a thogail.
2. Briog air a' phutan Tog port-adhair . Fosglaidh seo uinneag ùr air a bheil Tagh port-adhair'.
3. San uinneag seo, 's urrainn dhut taghadh dè an seòrsa dhe phort-adhair a tha thu airson togail. Aig toiseach a' gheama, cha bhi ri làimh dut ach am Port-adhair beag. Bidh barrachd puirt-adhair ri am faighinn rè ùine, ach 'S e am Port-adhair beag a dh'fheumas sinn cleachdadh aig an àm seo.
4. Gus àite iomchaidh a lorg airson a' phuirt-adhair, bidh e feumail ma chuireas tu an roghainn Seall raon-còmhdachaidh air.
5. Ma ghluaiseas tu an cùrsa timcheall a' mhapa, seallaidh ceàrnagan geala dhut far am biodh am port-adhair. Innsidh ceàrnagan purpaidh dhut na taighean is na gnìomhachasan a chleachdadh am port-adhair. On a tha thu a' togail port-adhair do thaistealaich an-dràsta, feuch an tagh thu àite far an còmhdaich thu na ghabhas dhe thaighean le ceàrnagan purpaidh. Cha chleachd taighean taobh a-muigh nan ceàrnagan purpaidh am port-adhair agad.

Àite freagarrach gus port-adhair a thogail.

6. Nuair a bhios a' chiad phort-adhair agad deiseil, feumaidh tu fear eile a thogail. Nuair a lorgas tu àite airson an fhir eile, dèan cinnteach gum bi an dà phort-adhair fada gu leòr air falbh o chàch a chèile ach am faigh thu airgead. An uairsin, lean air na ceuman 1 – 5 a-rithist.

Ceannaich plèana

1. Briog air togalach a' hangair sa phort-adhair far an tòisich a' chiad phlèana agad. Fosglaidh seo uinneag a' hangair.

Uinneag a' hangair.

2. Briog air a' phutan Carbadan ùra taobh clì air bonn uinneag a' hangair. Bheir seo dhut uinneag nan Carbadan-adhair ùra.
3. Thoir sùil air na carbadan-adhair a tha ri làimh, tagh fear is briog air a' phutan Ceannaich carbad-adhair. Nochdaidh uinneag a sheallas an carbad-adhair sa hangar. Tha am plèana comasach air taistealaich is beagan puist a ghiùlan o thùs.